Лічбавая гігіена | Kurs na odporność

«Кніжны Вырай» прымае ўдзел у праграме "Kurs na odporność", мэта якой умацаванне псіхалагічнага дабрастану і ўстойлівасці дзяцей і моладзі. У межах гэтай ініцыятывы мы засяродзіліся на тэме, якая нас асабліва хвалюе і з'яўляецца адным з найбольш сур'ёзных выклікаў сучаснасці - лічбавай гігіене.

Тэрмін рэалізацыі праекту 1.06.2025-31.08.2025

Пра праект

Сёння кожны з нас рызыкуе згубіцца ў бясконцай плыні інфармацыі, сутыкнуцца з хейтам ці паверыць у фэйкі. Але калі нават дарослым часам цяжка выплысці з гэтай плыні, то што казаць пра дзяцей і падлеткаў? Іх неакрэплая псіхіка робіць іх яшчэ больш безабароннымі перад выклікамі лічбавага свету. 

Асабліва гэта датычыцца дзяцей з досведам міграцыі: для іх інтэрнэт часта становіцца адзінай прасторай, дзе яны будуюць сваю ідэнтычнасць і адчуваюць сябе «сваімі». І тут хаваецца пастка: гэты бяспечны лічбавы свет можа незаўважна ізаляваць іх ад жывых стасункаў і сяброў тут і цяпер.

Таму мы вырашылі стварыць «Летні клуб лічбавых мінімалістаў» для беларускіх дзяцей і падлеткаў 10–14 гадоў у Кракаве. Гэта пяцідзённы інтэнсіў у атмасферы летняга лагера , дзе ўдзельнікі вучацца свядома карыстацца тэхналогіямі, развіваць крытычнае мысленне, распазнаваць маніпуляцыі ў сеціве і праводзіць свой час па-за экранам.
Праграма спалучае інтэрактыўныя заняткі па бяспецы ў інтэрнэце з творчымі афлайн-майстэрнямі: мы будзем ствараць зіны, займацца фатаграфіяй, каліграфіяй і маляваннем, каб паказаць каштоўнасць жывых зносін і рэальнай творчасці. 

1. Digital Minimalism: Choosing a focused life in a noisy world, Cal Newport (ангельская мова / польская мова / расейская мова)
2. Wyloguj swój mózg. Jak zadbać o swój mózg w dobie nowych technologii, Anders Hansen. Папулярная навукова-практычная кніга пра ўплыў тэхналогій на мозг і парады па лічбавай гігіене (польская мова / ангельская мова)
3. How to break up with your phone, Catherine Price - практычнае кіраўніцтва па зніжэнні залежнасці ад смартфона (ангельская мова) 
4. Wychowanie przy ekranie. Jak przygotować dzieci do życia w sieci, Магдалена Бігай. (польская мова)

Тэст дапамагае аб'ектыўна ацаніць свой узровень падрыхтоўкі да сучасных анлайн-пагроз. Ён не проста паказвае вынік, але і вучыць. Пасля завяршэння кожны ўдзельнік атрымлівае персаналізаваны справаздачу з рэкамендацыямі, якія дапамогуць ліквідаваць прабелы ў ведах.

Навошта праходзіць?

• Каб зразумець, наколькі добра вы разумееце свае стасункі з экранамі і як глыбока яны інтэграваліся ў вашае жыццё.
• Каб даведацца, у якіх сферах лічбавага жыцця вы можаце выйсці на новы ўзровень.

Удзел у тэсце не патрабуе ніякай аплаты. Не трэба пакідаць асабістыя даныя, якія могуць вас ідэнтыфікаваць.  Тэст разлічаны на шырокую аўдыторыю — ад школьнікаў да пенсіянераў. Пытанні і матэрыялы створаны спецыялістамі ў галіне кібербяспекі і медыяадукацыі.

🔗 Прайсці тэст лічбавай гігіены (па-польску) 

🔗 Прайсці тэст лічбавай гігіены (па-беларуску) 

Праект фінансуецца са сродкаў Польска-Амерыканскага Фонду Свабоды ў межах праграмы «Kurs na odporność», якую рэалізуюць сумесна Фонд «Edukacja dla demokracji» і Фонд «Szkoła z klasą».